قلبى اللى زى الطير..قصيدة عامية..محمد الخطيرى

قلبى اللى زى الطير

قلبى اللى زى الطير ... بجناح وحيد مكســـــور
حالف يداوى الجرح ... ويعيش حياته فى نـــور
ولا خوف هيقدر يمنعه ... ولا حتى مليون سور
حلمى ولايمكن أضيعه ... أنا مش هبات مكسور
ولا يوم هبيع الحق ... واشهد شهادة الـــــــــزور
قلبى اللى زى الطير
قلبى اللى عاش مخنوق ... ما بين جراح وأنيــن
ولا عمره داق الفرح ... ماشى فى طريقه حزين
حالف ما تبرد ناره ... إلا اما ياخــــد بتــــــــاره
من دنيا غــــــدارة ... وناس كتير خاينيــــــــــن
قلبى اللى زى الطير
قلبى اللى عاش حيران ... تايه ما بين طرقـــات
من جرح يمشى لجرح ... والحلم جواه مــــــات
حالف ليوصل لحلمه ... لو حتى مين اللى ظلمه
كاتم همومه وألمه ... صابر على الأزمــــــــات
********