قصيده روعه على البنات _ للشاعر سمير صبيح

اكتبلي غزل عن البنات** يا ترافة تريدهة بشعري تبات
يكلي شعرك ليش اهات ودموع
انته حقك ماشفت خط الشروع
انته ساعة سين تعرفهة شتلوع
تعرف الغاية تعرف الهاونات** اتكلي اكتبلي غزل عن البنات
******

شعري فك عينة لكة كبالة نطاق
بندقية وسفر وحب للعراق
حبلة وحدة والمواعيد التحاق
جان موعدنة بساحة عارضات** اتكلي اكتبلي غزل عن البنات
******
شريد اغازل جارتنه ام ثوب الوحيد
ليش اتكلبة حتى يبين جديد
تنتبه لبالهة بالهم شديد
خدود صفرة شلون اكول موردات** اتكلي اكتبلي غزل عن البنات
******
مرة كتلهة احبج شو بجت
اني خايف لا روحي اتجاوزت
طلعت خطية عدهة الحصة اتاخرت
دعوفني يا حب يا ذكريات** اتكلي اكتبلي غزل عن البنات
******
تريدني اكتب على الغزل والغي العناء
ا ني سبع سنين كاضيهة بحذاء
هدومي طلبة ذاك من ذاك الشر اء
مو فضل مني وعايش بهل حياة** اتكلي اكتبلي غزل عن البنات
******
عدنة ليلى تبيع بالوكفة دهن
وقيس عمالة يجد بس على البطن
ومن سألت جوليت كالت بالسجن
روميو تعبان بايك تايرات** اتكلي اكتبلي غزل عن البنات
******
خل يحجيلك دمع عينة اليسيل
وعن بثينة شتريد احجيلك قليل
عدهة سبع اطفال صارو من جميل
كلهم يجدون بالشارع حفات** اتكلي اكتبلي غزل عن البنات
******
يا علاقة اليوم ما بيهة دغش
والعلاقة الطيبة تنشال بنعش
شتعتقد سوزان ترتاح لدلش
لو شلش كشاخ وتحبة نجاة** اتكلي اكتبلي غزل عن البنات

مشكوررررررر على الموضوع الجميل